Метеоролозите предупредуваат дека Ел Нињо што се развива над Тихиот Океан би можел да достигне сила каква што не е забележана во поновата историја.
Според прогнозите на британската Метеоролошка служба, во комбинација со долгорочниот тренд на глобално затоплување, феноменот би можел да придонесе 2027 година да стане најтоплата досега измерена.
„Ова е невиден настан. Никогаш не сум видел толку силен сигнал за Ел Нињо во нашите прогнози“, изјави професорот Адам Скеиф.
Ел Нињо е природен климатски феномен кој се појавува на секои две до седум години и вообичаено трае околу една година. Во моментов, температурите на морската површина во клучниот дел од Тихиот Океан се повеќе од два степени над просекот.
Прогнозите укажуваат дека отстапувањето би можело да надмине три степени, а одредени климатски модели предвидуваат и екстремни четири степени над просекот.
Доколку се реализираат најекстремните сценарија, климатолозите предупредуваат дека би можело да станува збор за еден од најсилните Ел Нињо настани во последните неколку векови.
Последиците не би се однесувале само на температурите. Силен Ел Нињо може да влијае врз временските услови во различни делови од светот, земјоделството и снабдувањето со храна.
