Вистинска драма се одвивала над Лондон откако технички дефект на авион на „Бритиш ервејс“ довел до затворање на единствената активна писта на аеродромот Гетвик. Поради настанатата ситуација, девет авиони прогласиле вонредна состојба, а вкупно 14 летови морале да бидат пренасочени кон други аеродроми.
Инцидентот започнал кога авионот на летот БА2673 безбедно слетал на аеродромот Гетвик, но поради пријавен технички дефект останал неподвижен на пистата, со што привремено го блокирал целиот воздушен сообраќај. Од „Бритиш ервејс“ соопштија дека патниците безбедно го напуштиле авионот и дека немало повредени.
Додека пистата била затворена, девет авиони кои чекале дозвола за слетување биле принудени да го активираат меѓународниот код за вонредна состојба 7700, што се користи кога екипажот се соочува со итна ситуација. Според првичните информации, кај дел од леталата причината била намалената резерва на гориво поради продолженото чекање во воздух.
Покрај овие авиони, уште пет летови биле пренасочени кон други аеродроми без да прогласат вонредна состојба. Така, од вкупно 14 пренасочени летови, пет завршиле во Лутон, четири во Станстед, три во Бирмингем, додека по еден авион слетал во Хитроу и Бристол.
Меѓу погодените биле летови што пристигнувале од повеќе европски и северноафрикански дестинации, вклучувајќи ги Рим, Атина, Родос, Бари, Валенсија и Агадир, што предизвикало значителни доцнења и промени во распоредот на воздушниот сообраќај.
Од аеродромот Гетвик информираа дека пистата била затворена само ограничен временски период, по што техничкиот проблем бил отстранет и сообраќајот постепено бил нормализиран. Повеќето од пренасочените авиони подоцна се вратиле на својата првична дестинација, а аеродромот продолжил да функционира во вообичаен режим.
