Научници од Костарика соопштија дека откриле нов вид на таканаречената „ајкула дух“, односно химера, во длабоките води на Тихиот Океан.
Според истражувачите, новиот примерок се разликува од досега познатите видови по пократката њушка, потемната боја на телото и подолгата боцка на грбната перка. Откриен е во близина на Кејп Бланко и островот Дел Кањо.
Генетските анализи покажале дека овој примерок не е репродуктивно поврзан со претходно познатите видови, иако има одредени сличности со химери забележани во водите кај Перу и Чиле. Научниците велат дека ќе бидат потребни дополнителни истражувања за да се утврди дали станува збор за сосема нов вид.
Химерите се далечни сродници на ајкулите и ражите и живеат на големи длабочини, понекогаш и до 2.600 метри. Иако наликуваат на ајкули, од нив еволутивно се одвоиле пред речиси 400 милиони години.
