На железничките станици низ Кина овие денови владее особено голема гужва. Реките од патници се слеваат на пероните, носејќи тешки куфери и подароци. Милioni луѓе се враќаат дома за да го прослават кинескиот Новогодишен празник, најважниот празник во земјата.
За многумина, нивните родни градови се илјадници километри далеку од местата каде што денес живеат и работат, но тоа не ги спречува да патуваат. Денешните возови, кои порано би им одземале цел ден или повеќе, сега ги превезуваат рекордно брзо.
Триесетгодишната Ли патува од Западната станица во Пекинг до провинцијата Сечуан во внатрешноста на земјата. Патувањето од 1.500 километри порано искачуваше речиси 20 часа, а денес високобрзиот воз го прави за само осум часа.
- Ќе бидам дома до вечерта – вели Ли за „Фајненшел Тајмс“.
Огромен број патници
Кинеските високобрзи железници во последните неколку денови превезуваат околу 20 милиони патници дневно. За време на „Големата кинеска миграција“, 40-дневен период на патувања околу кинескиот Новогодишен празник, се очекува дури половина милијарда патувања со воз, известува „Јутарњи лист“.
Брзина и технологија
Најмалку три четвртини од патниците ќе патуваат со брзини над 200 километри на час, во бело-сребрени возови кои станале еден од симболите на индустриската моќ на Кина.
Не толку одамна, во 2003 година, Кина немаше ниту една високобрза железничка пруга. Денес, земјата располага со околу 50.000 километри високобрзи пруги – доволно да се покрие речиси целата Кина – во споредба со околу 8.500 километри во целата Европска унија до 2023 година.
Брзи, точни и ефикасни
Со две децении напредок, железничката мрежа денес ги поврзува 97% од кинеските градови со повеќе од половина милион жители. Проширувањето на мрежата се смета за доказ за кинескиот модел на државно воден технолошки развој.
Возовите се брзи и во голема мера точни, а билетите се резервираат преку мобилна апликација која истовремено ја следи побарувачката и овозможува додавање на вагони за време на пикот.
Светската банка процени дека Кина во 2019 година трошела меѓу 15 и 19 милиони евра по километар за изградба на високобрзи железници. Кина гради високобрзи пруги поефтино од ЕУ и САД, благодарение на поевтино земјиште, стандардизирани проекти и пофлексибилни регулативи.
