Меѓународна полициска операција откри и идентификува десетици осомничени кои, според истрагата, ги дрогирале и сексуално злоупотребувале своите партнерки, а потоа дел од нападите ги снимале и споделувале во затворени онлајн групи. Информациите ги објави „Си-ен-ен“, повикувајќи се на европски и британски безбедносни служби.
Според Европол и британската Национална агенција за криминал (НЦА), најчесто жртви биле жени кои биле онесвестувани со седативи или други супстанции пред да бидат нападнати. Во многу случаи, тие дури подоцна дознавале дека биле жртви на сексуално насилство, најчесто кога полицијата ги контактирала.
Истрагата покажала дека постоеле организирани онлајн групи каде сторителите разменувале совети, упатства и видеа, како и координирале начини за извршување и прикривање на злосторствата. Овие затворени канали, според истражителите, функционирале како мрежи во кои се нормализирало и поттикнувало насилството.
Во рамки на заедничката операција наречена „Проект Медуза“, во која учествувале повеќе европски држави со поддршка од САД, Канада, Бразил и други земји, досега се идентификувани 156 осомничени и жртви, отворени се над 270 истражни траги, а уапсени се 57 лица.
Истражителите предупредуваат дека вистинскиот обем на овие кривични дела веројатно е многу поголем од досега познатиот, бидејќи голем дел од случаите остануваат непријавени.
Од Европол истакнуваат дека ваквите дела сè почесто се организираат преку енкриптирани апликации и затворени форуми, каде се споделуваат и нелегални содржини, како и насоки за избегнување на откривање од страна на властите.
Британските обвинители и истражители оценуваат дека станува збор за еден од најсериозните и највознемирувачки облици на организирано сексуално насилство, кој покажува високо ниво на координација меѓу сторителите.
Во последните години во Европа се регистрирани повеќе случаи поврзани со слични методи, вклучително и познати судски процеси во кои биле осудени сторители за дрогирање и долготрајно сексуално насилство врз партнерки, често без нивно знаење.
Операцијата, според Европол, претставува еден од првите координирани обиди на повеќе држави да се справат со овој тип на дигитално олеснети сексуални злосторства, кои, како што предупредуваат експертите, брзо се шират преку интернет и затворени комуникациски канали.
