Масовен аларм во Велика Британија на 7 септември: Сите мобилни ќе звучат истовремено

На 7 септември во 15:00 часот, сите мобилни телефони во Обединетото Кралство што се поврзани на 4G и 5G мрежи ќе се огласат со силна сирена и вибрација кои ќе траат до 10 секунди. Паралелно, на екраните ќе се појави јасно известување дека станува збор за тест на системот за итни предупредувања.

Овој национален тест е дел од стратегијата за јавно предупредување за случаи на кризи како што се екстремни временски непогоди, пожари и други закани по животот. Според британската влада, ова ќе биде една од најголемите вежби за јавна безбедност во историјата на земјата.

Симболичен датум и важност

Тестот е закажан токму на 85-годишнината од почетокот на Blitz-от, воздушните напади на нацистичка Германија врз Велика Британија за време на Втората светска војна, што ја истакнува сериозноста и историската тежина на системот.

Министерот за меѓувладини односи, Пат Мекфаден, истакна дека системот е од голема важност и може да спаси животи, слично како домашните аларми за пожар. Тој ги повика граѓаните да го запаметат датумот и да го споделат со блиските.

Активирања досега и порака до граѓаните

Од воведувањето на системот во 2023 година, тој бил активиран пет пати, вклучувајќи ги предупредувањата за бура Еовин во Шкотска и Северна Ирска, бура Дара во јужен Велс, и поради откриена неексплодирана бомба од Втората светска војна во Плимут.

Граѓаните ќе добијат следнава порака:

„Ова е тест на системот за итни предупредувања на Владата на Обединетото Кралство. Во вистинска опасност, следете ги упатствата од пораката за да се заштитите вие и другите. Повеќе информации: gov.uk/alerts.“

Предлози за дополнителни канали за предупредување

Иако системот функционира преку паметни телефони, пратениците бараат и алтернативни начини на известување, особено за лица без пристап до дигитални уреди. Либералдемократката Сара Олни предложи воведување информативни брошури, како што практикуваат скандинавските земји.