ОН соопшти дека гладот и неухранетоста кај децата во Газа достигнуваат алармантни нивоа, предупредувајќи дека ситуацијата станува сè понеподнослива поради израелските ограничувања и недостигот од храна и медицинска помош.
Портпаролот на ОН, Фархан Хак, на прес-конференција изјави дека од 136.000 прегледани деца, над 2.500 страдаат од тешка акутна неухранетост – најопасната по живот форма, додека 40 деца веќе биле хоспитализирани поради животозагрозувачка состојба.
Во јули биле откриени речиси 12.000 акутно неухранети деца на возраст меѓу шест и 59 месеци, а загрижувачки е што процентот на тешко неухранети деца пораснал од 12% (март-мај) на 18% (јуни-јули).
ОН алармираат дека во јули, само 3% од потребните деца добиле пристап до микронутриенти, додека помошта со храна и медицински материјали е сериозно попречена. Голем дел од потребните ресурси остануваат заглавени на границите со Јордан и Египет поради израелски блокади.
Од март наваму, не е дозволен влез на ниту еден материјал за засолништа, а над 1 милион артикли за засолништа и преку 2,3 милиони основни потреби сè уште чекаат дозвола за влез.
Во вакви услови, децата во Газа се на работ на преживување, додека повеќе од 11% од анкетирани домаќинства живеат буквално под отворено небо. Хуманитарната ситуација е критична, со недостиг од храна, гориво, лекови и безбедни услови за живот.
ОН продолжуваат со обиди за медицинска евакуација и доставување помош, но реалноста е дека секој ден на доцнење го загрозува животот на илјадници деца.
