Во срцето на трагедијата што секојдневно ја тресе Газа, ноќеска се случи уште една катастрофа – камион натоварен со хуманитарна помош се преврте врз стотици цивили кои чекале ред за храна. Инцидентот се случи во областа Нусеират, каде според официјалните информации од Цивилната одбрана на палестинските власти, загинале најмалку 20 лица.
Неспоредливата сиромаштија и постојаната блокада ги натерале луѓето со часови да чекаат на хуманитарни конвои. Но овој пат, додека стотици луѓе биле насобрани во мракот, камионот се превртел – директно врз група цивили.
Портпаролот на Цивилната одбрана, Махмуд Басал, изјави дека трагедијата настанала поради движењето на возилото по оштетени, руинирани патишта кои претходно биле цел на бомбардирања. Според неговите тврдења, камионот бил насочен од израелската армија по оваа небезбедна и нестабилна рута, што довело до катастрофалниот исход.
Овој настан ја отсликува драматичната реалност во Газа, каде што хуманитарната помош стана прашање на живот и смрт – не само поради недостигот, туку и поради условите под кои се дистрибуира. Возачите и хуманитарците секојдневно се соочуваат со уништени патишта, недостиг на гориво, контроли, ризици од напади и логистички колапс.
Меѓународната заедница сè погласно бара зголемување на безбедноста при дистрибуцијата на помошта, но трагедиите како оваа ја покажуваат суровата вистина – дека дури и кога има храна, патот до неа може да биде смртоносен.
