Силен земјотрес со јачина од 6,0 степени според Рихтеровата скала го погоди источниот дел на Авганистан доцна синоќа, при што животот го загубија над 250 лица, а повеќе од 500 се повредени, соопшти Министерството за информации за агенцијата Анадолија.
Според податоците на Геолошкиот завод на САД (USGS), потресот бил регистриран во 19:17 часот по Гринич, на 27 километри источно-североисточно од Џалалабад, на длабочина од само 8 километри, што дополнително ја зголеми неговата разорна моќ.
Жртви и повредени се пријавени во областите Нур Гал, Савки, Ватпур, Маноги и Чапа Дара во провинцијата Кунар. Бројката на загинати сè уште не е конечна, бидејќи властите се во контакт со жителите од изолираните региони, а спасувачките екипи се обидуваат да стигнат до погодените подрачја.
Авганистанската привремена администрација мобилизираше хеликоптери за спасување и транспорт на повредените, бидејќи повеќе патишта се блокирани од свлечишта, што го отежнува пристапот до најтешко погодените места. Локалните жители сведочат дека станува збор за еден од најсилните земјотреси што го погодиле регионот во последните години.
Портпаролот на администрацијата, Забихула Муџахид, потврди дека има големи загуби. „За жал, вечерва земјотресот предизвика човечки жртви и огромна материјална штета во неколку источни провинции“, напиша тој на платформата Х. Муџахид додаде дека сите расположиви ресурси се насочени кон спасувачките мисии, а помош стигнува и од соседните провинции.
Покрај разорниот главен потрес, USGS регистрираше уште два последователни земјотреса со јачина од 5,2 степени, што дополнително го зголеми стравот кај населението.
Тимовите на терен се борат со време и непристапни услови, а експертите предупредуваат дека бројот на жртви би можел драматично да порасне во наредните часови.
