Имала само 16 години кога мистериозно исчезнала без никаква трага, оставајќи го своето семејство во неизвесност што траела речиси пет децении. Денес, по долгогодишна истрага и напредокот на ДНК-технологијата, една од најпознатите нерешени криминални мистерии во Канада конечно доби одговор.
Шерон Прајор, родена во 1959 година во Монтреал, била позната како мирна, вредна и примерна ученичка. Најблиските ја опишувале како девојка со големо срце, која имала посебна љубов кон животните и сонувала еден ден да стане ветеринар. Често згрижувала напуштени кучиња и мачки, а нејзината грижа за другите ја правела омилена меѓу пријателите и семејството.
Сè се променило на 29 март 1975 година.
Тој ден Шерон го поминала со својата мајка подготвувајќи се за Велигден. Заедно вапсувале јајца и планирале мирна празнична вечер. Подоцна посакала да замине до локалната пицерија „Марина“, каде што често се собирале младите.
Претходно требало да ја подигне својата спортска јакна како признание за нејзиниот успех, но кога дознала дека нема примерок во нејзината големина, се вратила дома разочарана.
Околу 18:30 часот повторно излегла од домот и се упатила кон пицеријата. Тоа било последниот пат кога некој ја видел жива.
Пријателите ја чекале, но таа никогаш не пристигнала. Во почетокот сите мислеле дека можеби се задржала или отишла кај своето момче, но како што минувале часовите, загриженоста прераснала во страв.
Следното утро започнала голема потрага во која се вклучиле полицијата, доброволци и голем број граѓани. И покрај обемната акција, од Шерон немало никаква трага.
Неколку дена подоцна, потрагата завршила со трагичен исход. Нејзиното тело било пронајдено во снег, недалеку од нејзиниот дом.
Истражителите тогаш утврдиле дека девојката била жртва на брутален напад. На местото биле пронајдени биолошки траги и прамени коса во нејзините раце, што укажувало дека до последен момент се обидувала да се одбрани.
И покрај бројните истраги, случајот со години останал нерешен и станал една од најголемите криминални мистерии во Канада.
Речиси 50 години подоцна, благодарение на современите ДНК-анализи, истражителите успеале да го идентификуваат осомничениот.
Станува збор за Френклин Метвуд Ромин, кој во времето на злосторството имал 28 години. Неговата ДНК целосно се совпаднала со биолошките докази зачувани од истрагата во 1975 година.
Сепак, правдата никогаш не стигнала до судница. Осомничениот во меѓувреме починал, па никогаш не се соочил со обвинение или судски процес за случајот што со децении ја потресуваше канадската јавност.
Иако виновникот беше идентификуван многу години подоцна, приказната за Шерон Прајор и денес останува симбол на долгата борба за вистината. Нејзиното семејство речиси половина век чекало одговор, а случајот покажува колку современата форензика може да помогне во расветлување и на најстарите нерешени злосторства.
