Иранското Собрание на експерти го избра Моџтаба Хамнеи, вториот најстар син на убиениот ајатолах Али Хамнеи, за нов врховен лидер на Иран, соопштија иранските медиуми и извори блиски до Собранието за „Иран Интернешнл“.
Изборот бил направен под силен притисок од Корпусот на Исламската револуционерна гарда (ИРГ), што покажува дека новото иранско раководство нема да се движи кон поумерен курс, туку ќе продолжи со тврдата политика на претходниот лидер.
Моџтаба Хамнеи е искусен во воените и безбедносни структури на земјата: како млад учествувал во Ирано-Ирачката војна во редовите на ИРГК, а подоцна ја водел паравоената организација Басиџ, која имала клучна улога во задушувањето на масовните протести по спорните претседателски избори во 2009 година.
Со неговиот избор, Иран испраќа јасна порака дека нема да прави компромиси во надворешната политика и односите со САД и Израел, додека регионалната тензија на Блискиот Исток продолжува да се зголемува.
