Анабел Шофилд, велшка манекенка и актерка, почина на 62-годишна возраст на 28 февруари, по долга борба со рак на мозокот, известува „Унилад“.
Шофилд ја започна кариерата како модел во 1980-тите, снимајќи за брендови како „Ив Сен Лоран“, „Римел“ и „Ревлон“. Таа се прослави и со култната реклама за фармерките „Бугл Бој“, во која возеше Ферари низ пустината. Како модел, работеше со лондонската агенција „Take Two“ и со познати фотографи како Дејвид Бејли, а се појавуваше и во едиторијали за италијанскиот „Вог“.
Подоцна, Шофилд се сврте кон глумата и ја паметат по улогата на Лорел Елис во популарната ТВ сапуница „Далас“. Таа исто така работеше како продуцент, учествувајќи во проекти како „Браќата Грим“ и „Град на светлината“, а во 2010 година ја основа својата продукциска компанија Bella Bene Productions.
Нејзиниот татко, Џон Д. Шофилд, бил успешен филмски продуцент, а Анабел, следејќи го неговиот пример, остави трага и во модната и во филмската индустрија.
„Ја сакавме затоа што беше автентична, забавна и неверојатно убава. Никогаш не се промени од таа слатка 17-годишна девојка што ја запознавме“, изјави поранешната сопственичка на агенцијата, Мелиса Ричардсон.
