Педесетгодишна жена од Тенеси поминала повеќе од пет месеци во затвор откако била погрешно идентификувана од систем за препознавање лица базиран на вештачка интелигенција и поврзана со финансиски измами во Северна Дакота, иако тврди дека никогаш не била во тој регион.
Случајот на Ангела Липс предизвика сериозни реакции во јавноста и отвори прашања за сигурноста на технологиите за препознавање лица во полициските истраги. Полицијата во Фарго призна дека се направени „неколку грешки“ во постапката.
Истражителите се потпирале на систем за препознавање лица кој укажал на „сличност“ со осомничено лице, по што, без доволна дополнителна проверка, бил издаден налог за апсење. Липс била уапсена во јули и држена во притвор со месеци, префрлена на повеќе од 1.600 километри од својот дом, со сериозни обвиненија за кражба и злоупотреба на лични податоци.
Пресврт во случајот настанал кога нејзиниот адвокат презентирал банкарски докази кои покажале дека таа во моментите на наводните дела се наоѓала во Тенеси. Обвиненијата биле отфрлени дури во декември, по што таа била ослободена.
Липс изјавила дека искуството било трауматично, додека нејзиниот правен тим разгледува можност за правна постапка поради повреда на граѓанските права. Станува збор за систем кој, според информациите, бил поврзан со технологија на компанијата Clearview AI, која користи огромни бази на податоци со фотографии собрани од интернет.
По овој случај, најавени се промени во процедурите: идентификациите преку препознавање лица ќе мора да бидат дополнително проверени и одобрени, а соработката со спорниот систем ќе биде прекината.
