Најмалку дваесет лица, меѓу кои и двајца полицајци, загинаа во голема полициска операција насочена против организираниот криминал во Рио де Жанеиро, соопштија локалните власти. Ова се случи само неколку дена пред градот да биде домаќин на неколку значајни меѓународни настани.
Гувернерот на сојузната држава Рио де Жанеиро, Клаудио Кастро, истакна дека државата нема да попушти пред криминалните групи. „Стоиме цврсто против нарко-тероризмот,“ порача тој преку социјалните мрежи.
Операцијата се спроведуваше во фавелите Алемао и Пења, со учество на околу 2.500 припадници на безбедносните сили, вклучувајќи специјални полициски единици и воена полиција. Од официјалните извештаи, осумнаесет од загинатите биле припадници на дилерски и криминални групи.
Овие операции, познати по својата бруталност, често се изведуваат пред големи меѓународни собири, со цел да се демонстрира контрола и безбедност. Следната недела, Рио ќе биде домаќин на самитот C40 на светските градоначалници и на доделувањето на наградите Earthshot под покровителство на британскиот принц Вилијам, на кое се очекува присуството на поп-ѕвездата Кајли Миног и возачот на Формула 1 Себастијан Фетел. Овие настани се вовед во светскиот климатски самит COP30 на Обединетите нации, кој ќе се одржи во Белем, на северот на Бразил.
Бразилските власти наведуваат дека акцијата била насочена кон криминалната група Comando Vermelho (Црвена команда), една од најстарите и најнасилни наркоорганизации во земјата. Официјалните извори ја опишуваат операцијата како најголема досега против оваа група.
Слични полициски акции се изведуваа и пред Светското првенство во фудбал во 2014 година, Олимписките игри во 2016 година и самитот Г20 во 2024 година, кога властите се обидуваа да ја прикажат земјата како безбедна за странските делегации и туристи.
Иако официјалните лица тврдат дека операцијата е неопходна за одржување на редот, човековите организации повторно предупредуваат дека ваквите акции често завршуваат со висок број цивилни жртви и дека проблемот со криминалот во фавелите не може да се реши само со вооружени интервенции.
Не дознавај последен - читај ПРВ.мк
