Руските сили извршија нови воздушни напади врз украински градови, при што има загинати и повредени цивили, како и значителна материјална штета.
Началникот на Воената управа на Запорошката област, Иван Федоров, изјави дека руски наведувани воздушни бомби погодиле станбена населба во Запорожје.
„Во нападот е предизвикано значително оштетување на станбена населба. Тешко е оштетена петкатница, а е забележан и удар во близина на деветкатница“, изјави Федоров.
Според украинските власти, бомбите уништиле два ката од петкатната зграда, а оштетени се прозорци и балкони на околните објекти. Пожар избувнал и во терминал на логистичка компанија.
Првично било соопштено дека загинале две лица, но спасувачките екипи подоцна од под урнатините го извлекле и телото на жена.
Во меѓувреме, руските сили со беспилотни летала го нападнале и градот Изјум во Харковската област, при што биле повредени 20 лица, меѓу кои и едногодишно дете. Оштетени биле пет станбени згради и 20 возила.
Нападите следуваат по масовниот руски ракетен напад врз Киев во ноќта меѓу 18 и 19 јули, во кој загина едно лице, а 16 беа повредени. Украинскиот претседател Володимир Зеленски изјави дека Русија лансирала повеќе од 40 ракети од различен тип и околу 120 ударни дронови врз Украина.
Од друга страна, Украина изврши напади врз објекти во јужниот дел на Русија, при што биле погодени магацини и објекти поврзани со нафтената индустрија. Нападите предизвикале неколку големи пожари.
Гувернерот на Ставрополската област, Владимир Владимиров, потврди дека имало експлозии и пожари во индустриски објекти, но соопшти дека нема информации за повредени лица. Дел од објектите биле евакуирани, а жителите биле преместени на безбедни локации.
„Ќе продолжиме со нашата реакција на руските напади на целосно оправдан и прецизен начин“, изјави Зеленски, додавајќи дека меѓу целите биле и танкери поврзани со руската флота во Црното Море.
