Американскиот претседател Доналд Трамп денеска изјави дека судбината на конфликтот со Иран зависи од одговорот на Техеран. Доколку Иран се согласи да ги прифати условите во преговорите, „Епскиот бес“ би завршил и Ормуската Теснина би била отворена за сите. Но ако не, Трамп предупреди дека ќе следи бомбардирање „на многу повисоко ниво и поинтензивно од порано“.
Според извештаите на „Аксиос“, САД и Иран се најблиску до договор од почетокот на конфликтот. Се разгледува прелиминарен меморандум од 14 точки кој би предвидел мораториум за збогатување на ураниум, постепено укинување на санкциите и ослободување на замрзнатите ирански средства.
Документот би означил крај на непријателствата и би започнал 30-дневен период на преговори за сеопфатен договор – со нуклеарни ограничувања, слобода на пловидба и економски мерки. Исламабад и Женева се споменуваат како можни локации за продолжување на разговорите.
Клучното прашање останува времетраењето на мораториумот: САД бараат до 20 години, Иран предлага пет, а компромисните решенија се движат меѓу 12 и 15 години. Се разгледува и можноста високо збогатениот ураниум да биде преместен надвор од земјата – едно од барањата на Вашингтон.
Државниот секретар Марко Рубио предупреди дека процесот е „сложен и технички тежок“, а американски претставници признаваат дека поделбите во иранското раководство можат да го отежнат постигнувањето конечен договор.
Одлуката на Трамп да се откаже од планирана воена операција во Ормуз, според извори, е директно поврзана со напредокот во преговорите и обидите да се зачува кревкото примирје.
