Генералниот секретар на НАТО, Марк Руте, соопшти дека во неутрализирањето на беспилотни летала над Полска учествувале авиони од четири земји-членки на Алијансата. Според полскиот премиер, три или четири беспилотни летала биле соборени.
„Синоќа, беспилотни летала од Русија го нарушија полскиот воздушен простор. Нашиот систем за воздушна одбрана беше активиран и територијата на НАТО беше успешно заштитена. Заедно со Полска беа вклучени полски Ф-16, холандски Ф-35, италијански и германски авиони, како и еден авион за полнење гориво“, изјави Руте на прес-конференција.
Тој додаде дека Алијансата спроведува сеопфатна проценка на наводите на Полска за инцидентот, а Советот на НАТО се состана за да ја разгледа ситуацијата во рамките на член 4 од Договорот за НАТО, кој предвидува консултации меѓу земјите-членки ако е загрозен територијалниот интегритет или безбедноста на некоја членка.
Претходно, полскиот премиер Доналд Туск изјави дека 19 беспилотни летала, кои според него биле „руски“, влегле во полскиот воздушен простор, но не приложи конкретни докази за потеклото на леталата.
Од Кремљ реагираа дека лидерите на ЕУ и НАТО често ја обвинуваат Русија за провокации без аргументи, додека вршителот на должност амбасадор во руската амбасада во Варшава, Андреј Ордаш, тврди дека беспилотните летала влегле на полска територија од Украина.
Началникот на Генералштабот на белоруската армија, Павел Марувејко, исто така изјави дека Белорусија ја известила Полска и Литванија за приближување на непознати летачки уреди кон нивната територија.
Овој инцидент ја поттикна сериозната загриженост за можноста за ескалација на конфликтот и ја потврди потребата од активна координација помеѓу сојузниците на НАТО во одбраната на воздушниот простор на Алијансата.
