Авиокомпанијата „Чајна Истерн“ следната недела ќе го воведе во својата понуда најдолгиот комерцијален лет во светот, кој ќе ги поврзува кинескиот економски центар Шангај и аргентинската престолнина Буенос Аирес, соопштуваат денешните медиуми.
Оваа релација, долга речиси 20.000 километри, ќе започне да функционира од 4 декември, поврзувајќи два града на речиси спротивни страни на земјината топка. Аргентинската влада официјално ја одобри линијата, објавувајќи ја одлуката во своето службено гласило.
Пресметките на „Чајна Истерн“ покажуваат дека летот од Шангај ќе трае околу 25,5 часа, додека летот за враќање од Буенос Аирес ќе трае 29 часа. Иако се работи за најдолгиот комерцијален лет, тој нема да биде непрекинат – авионот „Боинг 777-330ER“ ќе направи една меѓустаница во Окленд, Нов Зеланд, за технички проверки, полнење гориво и смена на персоналот.
Патниците за време на престојот од околу два часа во Окленд ќе имаат можност кратко да излезат од авионот, што ќе им овозможи мала пауза на долгата авионска рута. Овој лет претставува нов рекорд во светот на комерцијалното воздухопловство и големо искуство за љубителите на авионски патувања.
