Наоружани полицајци кои го обезбедуваат лондонскиот градоначалник Садик Кан направиле сериозен пропуст откако заборавиле торба со оружје пред неговата куќа, случај што го открила минувачка, пренесуваат медиумите.
Според изјавата на градежникот Џордан Грифитс за The Sun, неговата девојка ја пронашла торбата на улица во јужен Лондон во вторник навечер. Во неа се наоѓале полуавтоматска карабина Heckler & Koch MP5, пиштол Glock, електрошокер и муниција.
„Не можев да верувам на своите очи“, изјавил Грифитс, додавајќи дека веднаш повикал полиција откако сфатил што пронашол. По неколку минути, службени лица пристигнале и го презеле оружјето.
Тој наведува дека му било кажано дека торбата ја оставил еден од полицајците задолжени за безбедноста на Садик Кан, што има логика со оглед на тоа дека градоначалникот живее на таа локација.
Метрополитенската полиција потврди дека оружјето им припаѓа ним и соопшти дека торбата најверојатно била изгубена од дежурните полицајци непосредно пред да биде пронајдена од минувачката.
Портпаролот на градоначалникот оцени дека станува збор за „многу сериозен инцидент“ и истакна дека случајот е пријавен до Управата за професионални стандарди. Дополнително, беше нагласено дека мора да се преземат мерки за ваков пропуст да не се повтори во иднина.
Извор: Скопје1.мк
