Белгија од денеска повторно воведува воени патроли на улиците како дел од засилените безбедносни мерки, поради зголемени закани и сериозната загриженост за безбедноста во земјата. Според локалните извештаи, во првата фаза ќе бидат ангажирани околу 200 војници во период од три месеци, а потоа бројот треба да се намали на 90.
Првично, војниците ќе патролираат во Брисел и Антверпен, а мерките потоа ќе бидат проширени и во Лиеж. Посебен акцент е ставен на заштитата на еврејските објекти, особено по нападот врз синагога во Лиеж на 9 март, кој белгиските власти го осудија како антисемитски напад.
Покрај обезбедувањето на чувствителни локации, војниците треба да им помагаат и на полициските сили во критични точки како железнички станици, метро и други ризични области. Одлуката веќе предизвика и политички реакции во Белгија, при што дел од владините претставници оценија дека мерката е донесена пребрзо и без доволно широка расправа.
Ова е враќање на модел што Белгија веќе го применуваше по терористичките напади во Брисел во 2016 година, но сегашната одлука јасно покажува дека властите повторно гледаат сериозен безбедносен ризик во јавниот простор.
🔽 ОД ДЕНЕС СЛУШАЈ ЈА ТВОЈАТА ОМИЛЕНА РАДИО СТАНИЦА НА ПРВ.МК 🔽
