Рускиот претседател Владимир Путин предупреди дека конфликтот на Блискиот исток веќе создава сериозни потреси во глобалната економија, а неговите ефекти можат да бидат споредливи со последиците од пандемијата на коронавирус.
Говорејќи пред бизнис-лидери во Москва, Путин истакнал дека е речиси невозможно точно да се предвидат последиците од војната, дури и за оние кои директно учествуваат во конфликтот. „Последиците од конфликтот се тешко предвидливи, дури и за учесниците, а за нас тоа е уште потешко“, нагласил тој.
Претседателот посочил дека војната веќе го нарушува меѓународниот транспорт и логистика, го забавува производството и ја нарушува стабилноста на синџирите за снабдување, со посебен притисок врз секторите за енергија, метали и ѓубрива.
Глобалните пазари веќе реагираат на ескалацијата – растат цените на енергенсите, транспортот на стоки е пореметен, а тоа создава загриженост за можни долгорочни економски последици. Според Путин, овие ефекти можат да бидат слични на влијанието на КОВИД-пандемијата, која драматично ја успори економијата на сите континенти.
Неговите предупредувања доаѓаат во време на зголемена глобална напнатост и несигурност, што го прави овој конфликт сериозна закана не само за регионот, туку и за светската економија како целина.
