Мал едномоторен авион се урна во езерото Атерце во Австрија, а според првичните информации на полицијата, се стравува дека две лица го загубиле животот.
Станува збор за двајца млади германски државјани, за кои истражителите претпоставуваат дека биле инструктор по летање и негов ученик. Нивниот идентитет сè уште не е официјално и дефинитивно потврден.
Остатоците од авионот од типот Tecnam P2002 JF се лоцирани на длабочина од околу 160 метри во езерото. Надлежните планираат нивно извлекување, што би требало да помогне во утврдувањето на причините за несреќата.
Според податоците на „Flightradar24“, авионот полетал од Салцбург, а сигналот со податоци за летот исчезнал приближно половина час по полетувањето.
Австриската контрола на воздушниот сообраќај наведува дека леталото го користела австриска школа за летање.
Драматичниот момент го видел и американски турист, кој за ORF изјавил дека забележал бел авион како со голема брзина спирално се спушта кон езерото, по што удрил во водата.
Според медиумските извештаи, леталото веднаш потонало.
Полицијата засега не соопштува што би можело да ја предизвика несреќата. Истрагата продолжува, а повеќе информации се очекуваат по извлекувањето и анализата на остатоците од авионот.
