Во еден од најстрашните топлотни бранови ова лето, пожари беснеат низ Грција и Турција, оставајќи зад себе изгорени домови, уништена природа и човечки жртви. Илјадници луѓе ги напуштија своите живеалишта, додека пожарите сè уште неконтролирано се шират, предизвикани од сушата и силниот ветер.
На островот Крит, над 5.000 луѓе – туристи, локални жители и хотелски вработени – беа евакуирани од Иерапетра, каде што огнот се приближи до познатите туристички места. Некои од бегалците скокнаа во морето, од каде беа спасени од локални рибари и нуркачи.
Градоначалникот Манолис Франгулис изјави дека состојбата е тешка, но дека пожарникарите ја користат слабеењето на ветерот за да спречат нови пожари.
Во иста катастрофална слика се најде и пристаништето Рафина, источно од Атина, каде пожарот ја парализираше фериботската линија, а полицијата одела од врата до врата за да ги евакуира повозрасните граѓани. Неколку куќи и деловни објекти се оштетени, додека домашни животни биле пронајдени мртви, некои буквално изгорени живи во врзани шупи – потресни сцени што ги шокираа локалното население.
Во соседна Турција, ситуацијата не е помалку драматична – најмалку две лица го загубија животот, додека десетици населени места и туристички зони се под опасност од ширење на огнот. Сликите од теренот покажуваат дебели облаци од чад, огнени ѕидови и луѓе во паника што се обидуваат да избегаат.
Оваа катастрофа уште еднаш ги потсетува властите и светот на итноста од акција против климатските промени, но за многумина веќе е доцна – нивните домови се претворени во пепел.
