Администрацијата на американскиот претседател Доналд Трамп воведува нови, построги правила за издавање визи, со кои кандидатите што имаат одредени здравствени состојби – како дијабетес, гојазност или други хронични болести – би можеле да бидат оценети како „потенцијален товар за американските ресурси“ и со тоа да добијат одбивање за престој во земјата, објави „Си-би-ес њуз“.
Според новата директива, испратена од Стејт департментот до сите американски амбасади и конзулати ширум светот, службениците задолжени за визи добиваат овластување да ги земаат предвид здравствените состојби на подносителите на барањето, при што тие треба да проценат дали лицето би можело во иднина да бара скапа или долготрајна медицинска нега.
Широка листа на здравствени состојби под лупа
Во документот се наведува дека одредени болести, како кардиоваскуларни и респираторни заболувања, рак, дијабетес, метаболички и невролошки нарушувања, како и ментални состојби, би можеле да предизвикаат големи здравствени трошоци за државата. Поради тоа, лицата со вакви дијагнози може да се оценат како „неприкладни за престој“.
Дополнително, во директивата се истакнува дека гојазноста ќе се смета за фактор на ризик, бидејќи оваа состојба може да бара „скапа и долготрајна медицинска нега“.
Службениците ќе мора да утврдат дали апликантот има финансиска способност да ги покрие трошоците за своето лекување во текот на целиот животен век, без да бара јавна помош или државно финансирана институционална грижа.
Здравствената состојба и на семејството ќе се разгледува
Новата политика оди чекор понатаму, барајќи од службениците да ја разгледаат и здравствената состојба на членовите на семејството на подносителот на барањето за виза. Ако некој од нив има инвалидитет, хронична болест или посебни потреби, тоа може да влијае врз одлуката – особено ако се процени дека апликантот би можел да има потешкотии во задржување на работа поради грижата за нив.
Експерти предупредуваат: Одлуките може да бидат субјективни и проблематични
Чарлс Вилер од Католичката мрежа за легална имиграција предупредува дека оваа директива може да доведе до неправедни и субјективни одлуки, бидејќи службениците за издавање визи немаат медицинска обука за прецизно проценување на идните здравствени ризици на апликантите.
„Ова упатство веројатно ќе се применува главно кај луѓето кои бараат постојан престој во САД,“ објаснува Вилер, додавајќи дека недостигот на медицинско знаење кај службениците може да предизвика сериозни грешки при одлучувањето.
Инаку, и досега имигрантите беа обврзани да поминат медицински преглед кај лекар одобрен од американската влада, но новите правила значително го прошируваат влијанието на здравствените фактори врз процесот на издавање визи и престој во САД.
