Европската Унија од 1 јули официјално започнува со примена на дел од новиот трговски договор со Соединетите Американски Држави, со кој се укинуваат увозните царини за одредени американски производи. Одлуката е објавена преку официјален регулаторен документ на Европската Унија, а мерките ќе важат до 31 декември 2029 година, со можност за продолжување по дополнителна проценка.
Според договорот, Европската Унија ќе ги укине царините за дел од американската индустриска стока и ќе овозможи повластен пристап за одредени земјоделски производи од САД. Воедно, ќе продолжи и бесцаринскиот увоз на американски јастог, мерка која првично беше договорена за време на првиот претседателски мандат на Доналд Трамп.
Од Европската комисија наведуваат дека договорот содржи и заштитни механизми кои ѝ овозможуваат на Унијата привремено да ги суспендира трговските поволности доколку американската страна не ги исполни преземените обврски.
Економските аналитичари оценуваат дека новите правила имаат за цел дополнително зајакнување на трговските односи меѓу ЕУ и САД, намалување на административните бариери и олеснување на размената на стоки. Договорот формално ќе биде во сила до крајот на 2029 година, а неговата иднина ќе зависи од резултатите од предвидената евалуација и од евентуалните нови законски предлози на Европската комисија.
