Оваа недела, десет лица се обвинети за онлајн вознемирување и сексистички напади врз сопругата на францускиот претседател, Брижит Макрон, објавија француските медиуми. Обвинетите се товарат за ширење непотврдени и злонамерни тврдења за нејзиниот пол и сексуалност, како и коментари поврзани со разликата од 24 години помеѓу неа и нејзиниот сопруг. Ако бидат прогласени за виновни, се соочуваат со затворска казна до две години.
Меѓу обвинетите се наоѓаат општински советник, сопственик на галерија и наставник. Две од обвинетите – новинарката Наташа Реј и интернет-гатачката Амандин Роа – веќе беа осудени минатата година за клевета, откако тврдеа дека Брижит Макрон всушност е нејзиниот брат Жан-Мишел Троње, кој го променил полот. Апелацискиот суд подоцна ги ослободи од обвинение, пресудувајќи дека нивните изјави не претставуваат клевета, но семејството Макрон продолжи со жалби.
Теоријата на заговор дека Брижит е трансродова жена се појави во францускиот онлајн простор уште во 2017 година, по изборот на Емануел Макрон за претседател. Во последниве години, овие непотврдени тврдења се проширија и во Соединетите Држави, особено преку крајнодесничарската инфлуенсерка Кендис Овенс. Минатиот јули, семејството Макрон поднесе тужба против Овенс, обвинувајќи ја за „игнорирање на веродостојни докази кои ги побиваат нејзините тврдења и давање платформа на заговорници и клеветници“.
Адвокатот на семејството, Том Клер, во подкастот „Fame Under Fire“ изјави дека Брижит Макрон ги сфатила обвинувањата „исклучително сериозно“ и дека тие станаа „одвлекување на вниманието“ за францускиот претседател. Емануел Макрон нагласи дека случајот против Овенс е „прашање на одбрана на честа“ на неговата сопруга, бидејќи инфлуенсерката „свесно ширела лаги со цел да наштети, во служба на одредена идеологија и со врски со крајнодесничарски лидери“.
Не дознавај последен - читај ПРВ.мк
