Морски дрон експлодираше во романското црноморско пристаниште Констанца, без да предизвика човечки жртви, соопштија романските власти. Инцидентот се случил во близина на терминал за нафта и гас, по што биле преземени итни безбедносни мерки и евакуиран дел од околината.
Според романското Министерство за одбрана, дронот не припаѓал на романската армија и најверојатно бил од типот што се користи во војната во Украина. Властите засега не соопштуваат официјално чиј бил дронот, додека истрагата продолжува.
По експлозијата биле активирани безбедносните служби, крајбрежната стража и воздухопловни единици, а хеликоптери го надлетувале подрачјето во потрага по евентуални дополнителни закани. Според локалните власти, повеќе од илјада лица биле предупредени или привремено евакуирани од околните области како мерка на претпазливост.
Инцидентот доаѓа само една недела откако дрон удри во станбена зграда во романскиот град Галац, во близина на границата со Украина. Тоа дополнително ги зголеми стравувањата од прелевање на конфликтот врз територијата на земја членка на НАТО.
Романскиот претседател Никушор Дан изјави дека безбедносните ризици во регионот се зголемени поради војната во Украина и нагласи дека Романија ќе продолжи тесно да соработува со сојузниците во НАТО за заштита на својата територија и граѓани.
