Израелскиот министер за национална безбедност Итамар Бен Гвир остро реагираше на рамковниот договор меѓу Израел и Либан, постигнат со посредство на Соединетите Американски Држави. Тој оцени дека договорот е сериозна грешка и побара премиерот Бенјамин Нетанјаху да го стави на гласање пред целата влада.
Бен Гвир, лидер на десничарската партија „Оцма Јехудит“, изрази сомнеж дека либанските власти ќе успеат да го разоружаат Хезболах. Според него, единствено израелската армија може трајно да ја отстрани заканата од оваа вооружена група.
Договорот беше потпишан по повеќедневни разговори во Вашингтон меѓу претставници на Израел, Либан и САД, со цел постепено да се стави крај на конфликтот и да се создадат услови за долгорочна стабилност во регионот.
Според договорената рамка, Либан треба да воспостави целосна државна контрола на својата територија и да ги разоружа сите недржавни вооружени формации, вклучувајќи го и Хезболах. За возврат, Израел постепено ќе ги повлекува своите сили, но само доколку безбедносните услови се исполнуваат и договорот се спроведува во пракса.
Израелските власти нагласуваат дека немаат територијални претензии кон Либан и дека военото присуство ќе заврши кога ќе биде гарантирана безбедноста на границата. Сепак, изјавите на Бен Гвир покажуваат дека договорот веќе предизвикува сериозни политички несогласувања во самиот израелски државен врв.
