Талибанците издадоа нова наредба насочена кон тајните салони за убавина низ Авганистан, предупредувајќи ги жените дека имаат само еден месец да ја прекинат работата или ќе се соочат со апсење и кривична одговорност.
Иако сите салони за убавина беа официјално затворени во август 2023 година, илјадници жени продолжија да работат во тајност. Според проценки, затворањето погоди околу 12.000 бизниси и остави без приход повеќе од 50.000 козметичарки, но и покрај строгата забрана, салоните тајно функционираа ширум земјата.
Сега, властите побарале од локалните лидери и постарешини во заедниците да ги идентификуваат овие салони и да ги пријават жените кои ги водат, по што полицијата за „пороци и доблести“ ќе преземе мерки.
Фреста, 38-годишна мајка на три деца, раскажува дека по воведувањето на забраната била приморана да отвори таен салон за да го издржува своето семејство. „Мојот сопруг е болен, а јас имам три деца. Салонот беше единствениот начин да преживееме. Но и покрај тоа, ми беше радост да им ја вратам насмевката на жените кога ќе се погледнат во огледало. Сега ризикот е премногу голем и не знам како ќе продолжиме,“ изјавила таа.
Од преземањето на власта во август 2021 година, жените во Авганистан се соочуваат со систематска забрана: не смеат да работат во повеќето професии, девојчињата немаат пристап до средно и високо образование, теретаните и јавните паркови им се недостапни, не смеат да патуваат без машка придружба и мора целосно да бидат покриени секогаш кога ја напуштаат куќата.
Меѓународните организации за човекови права го нарекуваат ова „родов апартхејд“, предупредувајќи дека жените во Авганистан се буквално избришани од јавниот живот.
