Континуираниот раст на индустриското производство е многу добра вест за македонската економија, соопшти премиерот Христијан Мицкоски.
Индустриското производство во јули оваа година порасна за 4,1 процент споредено со истиот месец минатата година, што е првиот индикатор за третиот квартал од 2025 година, напиша Мицкоски на својот Фејсбук профил.
„Преработувачката индустрија е носечки фактор за порастот на индустриското производство со раст од 7 отсто споредено со истиот месец минатата година. Кумулативно, индустриското производство од почетокот на годината заклучно со јули (во првите седум месеци од 2025 година) порасна за 3 отсто споредено со истиот период минатата година, а преработувачката индустрија порасна за 4,5 отсто. Целосно се менува структурата на македонската економија“, истакна Мицкоски.
Премиерот нагласува дека расте бројот на туристи и ноќевања, бруто-домашниот производ се зголемува, расте цената на откуп на земјоделските производи, градежништвото се развива, трговијата напредува, и дека Македонија се трансформира од земја каде криминалот и корупцијата беа секојдневие, во земја на економски раст, стабилност и победи.
