Српската Влада воведе нови мерки со кои од утре цените на околу 20.000 производи ќе бидат пониски, како резултат на ограничување на маржите до максимум 20 проценти за големите трговски синџири кои во 2024 година оствариле приходи над 4,5 милијарди динари (околу 38 милиони евра).
Министерот за финансии, Синиша Мали, најави дека намалувањето на цените ќе изнесува во просек 10-20 проценти, зависно од претходната маржа на производот, и дека оваа мерка ќе се однесува на 25 видови производи, вклучувајќи млеко, јајца, свежо овошје и зеленчук, месо, риба, тестенини, шеќер, масла, пијалоци, хемија за домаќинство и производи за лична хигиена.
Претседателот Александар Вучиќ предупреди дека некои трговски синџири се обиделе да ги заобиколат правилата, зголемувајќи ги цените пред стапувањето во сила на Уредбата и потоа користејќи попусти за да ја одржат маржата. По ваквите обиди, Владата го ограничи „логистичкиот рабат“ и надоместоците за недостиг на стока и отпис на стока на три и еден процент, со цел мерката да се спроведе ефикасно.
Министерката за трговија, Јагода Лазаревиќ, истакна дека со новите правила се обезбедува дека намалувањето на цените ќе се однесува на целиот асортиман на секојдневни производи во сите големи малопродажни синџири, што ќе ја олесни куповната моќ на граѓаните во наредните шест месеци.
