Силно невреме го зафати денес цела Албанија, предизвикувајќи хаос од Тирана до Валона и Лежа. Бурата собори дрвја, шатори и инвентар од локални барови и ресторани, а некои патишта беа делумно или целосно блокирани.
Во Тирана силните ветрови беа придружени со обилен дожд кој траеше околу час и половина. Меѓународниот аеродром „Мајка Тереза“ во Ринас привремено ја запре работата на пистата, иако слетувањата продолжија нормално. Во главниот град најмалку 20 лица беа пренесени во Трауматолошката болница со повреди предизвикани од невремето.
Во Валона, дождот предизвика поплави на неколку главни и споредни патишта, а беа зафатени и 15 куќи. Поплавените улици создадоа сообраќајни метежи, а многу туристи брзаа да го напуштат градот, блокирајќи ги влезовите и излезите.
Во Драч, туристите беа принудени да ја напуштат плажата, додека силните ветрови предизвикаа материјална штета и паднати дрвја на споредните патишта, создавајќи проблеми за движењето на возилата.
Властите ги повикуваат граѓаните да бидат внимателни, да избегнуваат непотребни патувања и да не се движат во ранливи подрачја додека не се стабилизираат временските услови.
Видео:
