Израелската влада донесе важна и ретко гледана одлука: да им дозволи на стотици семејства од заедницата Бнеи Манаша – етничка група од североисточна Индија која тврди дека потекнува од древното израелско племе Манасија – да се доселат во Израел во следните години.
Во првата фаза, 1.200 луѓе ќе добијат дозвола да пристигнат до крајот на следната година, а според владините планови, до 2030 година во земјата ќе се преселат вкупно околу 5.800 членови на оваа заедница. Новодојденците ќе бидат населени во северниот дел на Израел – регион кој последните години беше силно погоден од конфликтите и ракетните напади на Хезболах и од кој се иселени десетици илјади граѓани.
Премиерот Бенјамин Нетанјаху ја опиша програмата како „важен и ционистички проект“, истакнувајќи дека доселувањето на оваа заедница ќе помогне за економско и демографско зајакнување на северниот регион.
Планот не е евтин: само за 2026 година се проценува дека државата ќе потроши околу 27 милиони долари за сместување, учење хебрејски, интеграција на пазарот на труд и адаптација на семејствата.
Ова не е првпат Израел да ги прифаќа Бнеи Манаша. Во последните дваесет години, околу 4.000 припадници на оваа заедница веќе се преселиле во Израел. Новиот проект има цел да ја заврши нивната повеќедецениска миграција, која многумина во Израел ја сметаат за историско „враќање“ на еден изгубен дел од еврејскиот народ.
Според израелските власти, ова е комбинација од национална стратегија, демографска поддршка и исполнување на длабоки верски убедувања дека Бнеи Манаша навистина се потомци на едно од библиските изгубени племиња.
