Поранешниот директор на ЦИА и американски министер за одбрана Роберт Гејтс жестоко го нападна Владимир Путин, тврдејќи дека рускиот лидер верува оти неговата историска мисија е враќање на Руското Царство – а без Украина тоа е невозможно.
Во интервју за Bloomberg, Гејтс директно порача дека „Путин никогаш нема да се откаже од Украина, па дури ни по цена на катастрофа“. Според него, Украинците тоа многу добро го знаат, а Западот предоцна се освестува за опасноста.
„Русија без Украина не е империја“, цитира Гејтс зборови од својот ментор Збигњев Бжежински, додавајќи дека Путин или ќе ја направи Украина дел од Русија, или нејзина покорна држава што ќе слуша што ѝ се кажува од Москва.
Истовремено, Гејтс не го поштеди ни Доналд Трамп, за кого рече дека нема капацитет да ја запре Путинова офанзива, туку напротив – со својата политика му дава простор за напредување.
„Многу американски претседатели верувале дека можат да го 'освојат' Путин со личен шарм. Сите тие биле разочарани. Не е ни Трамп исклучок“, истакна Гејтс.
Додека во Киев веќе не се надеваат на примирје, Кремљ зборува за „долг дипломатски процес“, но Песков јасно кажа – не очекувајте чуда.
„Путин е спремен да плати било која цена за да си ја исполни визијата – вклучувајќи ја и целосната контрола над Украина“, завршува Гејтс.
Ask ChatGPT
