Карло Анчелоти нов селектор на Бразил – заминува од Реал Мадрид по крајот на сезоната
Италијанскиот фудбалски стратег Карло Анчелоти и официјално е назначен за селектор на бразилската фудбалска репрезентација, потврдија бројни светски медиуми. Тој ќе ја преземе функцијата на 26 мај, веднаш по завршувањето на актуелната сезона со Реал Мадрид, со што ќе биде ставен крај на неговиот втор мандат на клупата на „Кралскиот клуб“.
Анчелоти го водеше Реал до две титули во Ла Лига и три трофеи во Лигата на шампионите, но реши да ја прифати понудата од Бразилската фудбалска федерација, иако имаше уште една година од договорот со шпанскиот клуб. Според информации на „Атлетик“, Италијанецот уште на крајот на април ја соопштил својата одлука на управата на Реал, а во меѓувреме биле финализирани сите детали од неговиот нов ангажман.
Анчелоти ќе ја предводи „Селесао“ до крајот на Светското првенство во 2026 година, кое ќе се одржи во САД, Канада и Мексико.
Шпанскиот весник „АС“ објави дека Анчелоти ќе заработува рекордни 770.000 евра месечно, што е околу 9,2 милиони евра годишно – речиси двојно повеќе од примањата на неговите претходници, Тите и Доривал Жуниор.
Со ова назначување, Бразил не само што добива тренер со исклучително богато меѓународно искуство, туку и испраќа силна порака за своите амбиции на претстојниот Мундијал.
