Општина Центар ќе организира бесплатни здравствени консултации за граѓаните на 6 април, во пресрет на Светскиот ден на здравјето, информира градоначалникот Горан Герасимовски.
Настанот ќе се одржи во Општинскиот младински центар „Матично“ од 09:00 до 15:00 часот, каде граѓаните ќе можат да добијат бесплатни совети и превентивни проверки.
„Ги поканувам граѓаните да дојдат и да се консултираат со тим специјалисти, да направат мерење на крвен притисок и шеќер во крвта и да добијат бесплатни совети. Целта е да ја поттикнеме свеста за грижата за сопственото здравје и значењето на превентивните контроли. Здравото население е најголемото богатство“, изјави Герасимовски.
Во рамки на настанот, граѓаните ќе можат да разговараат со гинеколог, ортопед, дерматовенеролог и инфектолог, додека студенти по медицина ќе вршат мерење на крвен притисок и гликоза.
Во стручниот тим се вклучени и советници од Советот на Општина Центар, а активноста се реализира во соработка со ХЕРА – Асоцијација за здравствена едукација и истражување.
Од Општината истакнуваат дека продолжуваат со активности насочени кон унапредување на квалитетот на живот и промоција на здрави навики кај граѓаните.
