Американски научници направија значаен пробив во областа на синтетичката биологија, откако со помош на вештачка интелигенција успешно создадоа нови, функционални вируси што можат да се реплицираат во лабораториски услови.
Станува збор за 16 новосоздадени бактериофаги – вируси кои напаѓаат исклучиво бактерии и не претставуваат закана за луѓето. Истражувачите истакнуваат дека ова е првпат генеративна вештачка интелигенција да биде искористена за дизајнирање целосни вирусни геноми.
Тимот од Универзитетот Стенфорд ги обучил моделите на вештачка интелигенција со голем број генетски секвенци од вируси, бактерии, растенија и луѓе. Потоа системот генерирал стотици можни дизајни, од кои научниците ги избрале најперспективните за лабораториско тестирање.
Од вкупно 302 синтетизирани кандидати, 16 успешно ги инфицирале и уништиле бактериите Escherichia coli, што покажува дека вештачката интелигенција може да создава нови биолошки структури кои функционираат во пракса.
Истражувачите сметаат дека ова откритие би можело да отвори нови можности за развој на терапии, антибиотици и други медицински третмани. Сепак, експертите предупредуваат дека ваквиот технолошки напредок носи и сериозни безбедносни предизвици, бидејќи истите алатки би можеле потенцијално да бидат злоупотребени за создавање опасни патогени.
Затоа, покрај научниот ентузијазам, сè погласни се повиците за строги правила и меѓународен надзор врз развојот и примената на ваквите технологии.
