Децата кои биле вакцинирани против ХПВ (хуман папилома вирус) на возраст од 12 до 13 години имаат речиси нула ризик да починат од рак на грлото на матката пред 30-годишна возраст, покажува ново значајно истражување спроведено во Англија.
Станува збор за првата голема студија од овој тип, која покажува драматично намалување на смртноста од овој вид рак откако вакцината почнала да се применува кај девојчињата во училишна возраст од 2008 година. Според податоците, благодарение на вакцинацијата досега се спасени околу 200 животи во Англија.
Истражувањето открива дека во периодот од 2020 до 2024 година не е регистриран ниту еден смртен случај од рак на грлото на матката кај жени на возраст од 20 до 24 години, што претставува прв ваков петгодишен период без смртни случаи. Без воведување на вакцинацијата, се проценувало дека во истиот период би се очекувале околу 23 смртни случаи.
Експертите нагласуваат дека вакцината има директно влијание врз спречување на инфекцијата со ХПВ, вирус кој е одговорен за речиси 99 проценти од случаите на рак на грлото на матката. Иако поголемиот дел од ХПВ инфекциите поминуваат без последици, одредени типови можат да предизвикаат клеточни промени кои со текот на годините се развиваат во малигно заболување.
Професорот Питер Сасиени од Универзитетот „Квин Мери“ во Лондон, главен истражувач на студијата, истакнува дека резултатите покажуваат како една единствена вакцина може речиси целосно да спречи појава на одреден вид рак.
И покрај позитивните резултати, ракот на грлото на матката сè уште останува меѓу почестите видови рак кај жените во Обединетото Кралство, со околу 3.300 нови случаи годишно.
Организацијата „Cancer Research UK“, која го финансирала истражувањето, оценува дека резултатите претставуваат значаен научен напредок, но предупредува дека опфатот со вакцинација сè уште не е на посакуваното ниво.
Експертите очекуваат бројот на смртни случаи да продолжи да се намалува како што вакцинираните генерации стареат и како што опфатот со ХПВ вакцинацијата ќе се зголемува во иднина.
