Научниците открија дека длабоко под површината на Земјата постои богат подземен екосистем во кој живеат микроорганизми способни да опстанат во екстремни услови. Откритието отвора нови прашања за границите на животот на нашата планета и можноста слични форми на живот да постојат и надвор од неа.
Меѓународен тим истражувачи утврдил дека овие микроорганизми живеат стотици метри, а на некои места и неколку километри под земјата, каде нема сончева светлина. Наместо фотосинтеза, тие ја добиваат потребната енергија преку хемиски реакции меѓу минералите и водата.
Според научниците, подземната биосфера е еден од најмалку истражените екосистеми на Земјата. Во неа се наоѓа огромен број микроорганизми со голема генетска разновидност, кои милиони години се развивале изолирано и се приспособиле на суровите услови во внатрешноста на планетата.
Ова откритие е важно и за астробиологијата, бидејќи покажува дека живот може да постои и без сончева светлина. Поради тоа, научниците сметаат дека слични микроорганизми би можеле да се кријат и под површината на Марс или на ледените месечини Европа и Енцелад, каде што има докази за присуство на подземна вода.
