Коосновачот на „Мајкрософт“, Бил Гејтс, предупреди дека брзиот развој на вештачката интелигенција носи и сериозни ризици доколку технологијата биде злоупотребена.
Во интервју за Ен-би-си, Гејтс изјави дека моќта на современите системи за вештачка интелигенција е толку голема што во екстремно сценарио би можела да биде поврзана со катастрофални настани со огромен број човечки жртви.
„Вештачката интелигенција секако е доволно моќна да предизвика настани што би довеле до милијарда мртви“, изјави Гејтс, одговарајќи на прашање за потенцијалните егзистенцијални ризици од технологијата.
Тој особено го истакна ризикот од злоупотреба на напредните АИ-системи од злонамерни актери, оценувајќи дека комбинацијата од луѓе со опасни намери и најсовремените технолошки алатки може да претставува сериозна закана.
Според Гејтс, компаниите што развиваат вештачка интелигенција не треба сами да одлучуваат за сите безбедносни стандарди. Тој смета дека во воспоставувањето правила и механизми за надзор треба да бидат вклучени и државните институции.
Дебатата за безбедноста и регулирањето на вештачката интелигенција дополнително се засилува паралелно со нејзиниот брз развој и сè пошироката примена во различни области.
