Сè повеќе млади луѓе ширум светот заболуваат од одредени видови рак, а ново научно истражување сугерира дека една од можните причини би можела да биде забрзаното биолошко стареење на организмот.
Истражувањето, спроведено од научници од Медицинскиот факултет на Универзитетот во Вашингтон, покажува дека кај поновите генерации постои поголема разлика меѓу хронолошката возраст – бројот на години што ги има човек – и биолошката возраст, која покажува колку всушност старее организмот.
Во анализата биле опфатени повеќе од 150.000 учесници од британската база UK Biobank, а резултатите покажале дека лицата родени меѓу 1965 и 1974 година имаат поголемо биолошко стареење во споредба со генерациите родени во 1950-тите. Дополнително американско истражување укажува дека оваа разлика е уште поизразена кај лицата родени во 1990-тите.
Според авторите, забрзаното биолошко стареење може да биде поврзано со почеста појава на рак на дебелото црево, рак на телото на матката и одредени видови рак на коскената срцевина кај лица помлади од 50 години.
Сепак, научниците нагласуваат дека станува збор за опсервациско истражување, кое покажува поврзаност, но не докажува дека забрзаното биолошко стареење директно предизвикува рак.
Како фактори што можат да придонесат за побрзо биолошко стареење се наведуваат дебелината, недоволната физичка активност, долгото време поминато пред екрани и нарушениот сон.
Експертите советуваат здрав начин на живот, редовна физичка активност, балансирана исхрана и навремени лекарски прегледи, нагласувајќи дека раното препознавање на симптомите останува еден од најважните фактори за успешно лекување на малигните заболувања.
