Кина направи уште еден голем чекор во технолошките иновации, откако во близина на Шангај официјално започна со работа првиот подводен дата-центар во светот кој се напојува исклучиво со енергија добиена од ветерници.
Проектот е реализиран во соработка меѓу компанијата HiCloud Technology и државната корпорација China Communications Construction, а центарот е поставен на околу 10 метри под морската површина и повеќе од 10 километри од брегот.
Според кинеските власти, објектот располага со капацитет од 24 мегавати и претставува дел од пошироката стратегија за обезбедување енергетски поефикасни решенија во време кога вештачката интелигенција и дигиталните услуги бараат сè повеќе компјутерска моќ.
Најголемата предност на подводниот дата-центар е природното ладење. Наместо огромни системи за климатизација и разладување како кај традиционалните центри на копно, овде морската вода ја презема улогата на природен ладилник.
Според официјалните податоци, ова решение овозможува намалување на потрошувачката на електрична енергија за повеќе од 20 проценти. Кај класичните дата-центри, дури една третина од вкупната електрична енергија се троши за одржување на оптимална температура на серверите.
Експертите сметаат дека ваквите проекти би можеле да станат важен дел од иднината на глобалната ИТ-индустрија, особено поради експлозивниот раст на вештачката интелигенција и потребата од сè поголеми капацитети за обработка и складирање на податоци.
Подводниот центар кај Шангај претставува прв чекор кон нова генерација еколошки и енергетски ефикасни дата-центри кои би можеле да ја променат иднината на дигиталната инфраструктура.
