Смеењето не е само знак на добро расположение, туку има значајна улога во развојот на детскиот мозок, вели Жаклин Хардинг, експерт за рано детство од Универзитетот Мидлсекс во Лондон.
Според неа, кога децата се смеат, нивниот мозок активно учи, создава нови врски и се развива. Смеата ги активира деловите од мозокот задолжени за движење, размислување и учење уште пред децата целосно да го развијат говорот.
Истовремено, смеењето ги намалува хормоните на стрес, како кортизолот и адреналинот, а го поттикнува лачењето на допамин, серотонин, ендорфини и окситоцин – супстанции поврзани со добро расположение, чувство на сигурност и емоционална поврзаност.
Од друга страна, долготрајниот стрес може негативно да влијае врз учењето, имунитетот и развојот на деловите од мозокот одговорни за емоциите и меморијата.
Хардинг нагласува дека родителите можат да придонесат за здравиот развој на своите деца преку спонтана и креативна игра, која не само што предизвикува смеа, туку помага и во развојот на емоционалната стабилност, социјалните вештини и когнитивните способности.
Таа смета дека хуморот и играта треба да имаат поголемо место и во образовниот процес, бидејќи можат да го намалат стресот и да ја подобрат концентрацијата и меморијата кај децата.
