Светската здравствена организација (СЗО) објави нов извештај во кој предупредува дека, доколку не се преземат итни мерки за превенција, рано откривање и подобар пристап до лекување, бројот на новодијагностицирани случаи на рак во светот би можел значително да се зголеми до 2050 година.
Според извештајот за состојбата со ракот за 2026 година, годишниот број на нови случаи би можел да достигне 35 милиони, во споредба со 20,6 милиони регистрирани во 2024 година.
СЗО предупредува дека ракот ќе допре речиси до секое семејство. Проценките покажуваат дека дури 92 проценти од светската популација во текот на животот ќе биде засегната од оваа болест – било лично, било преку близок член на семејството.
Извештајот укажува и на големите разлики меѓу земјите кога станува збор за лекувањето. Во побогатите држави стапката на преживување кај ракот на дојка достигнува околу 85 проценти, додека во посиромашните земји е околу 40 проценти. Дополнително, само 39 проценти од земјите обезбедуваат барем минимално ниво на третман за пациентите.
Од организацијата предупредуваат дека современите терапии и медицинските иновации сè уште не се достапни за голем дел од светската популација, поради што многу пациенти остануваат без соодветна здравствена грижа.
Генералниот директор на СЗО, Тедрос Аданом Гебрејесус, порача дека шансите за преживување не смеат да зависат од местото каде што човек е роден или од неговата финансиска состојба, нагласувајќи дека пристапот до квалитетно лекување треба да биде достапен за сите.
Покрај здравствените последици, ракот претставува и сериозен финансиски товар. Според извештајот, повеќе од половина од пациентите и нивните семејства се соочуваат со огромни трошоци за лекување, што во многу случаи доведува до сериозни финансиски проблеми.
Од аспект на ризик-факторите, СЗО наведува дека пушењето е во опаѓање во споредба со претходната деценија, но предупредува дека дебелината, физичката неактивност и недоволниот напредок во намалувањето на консумацијата на алкохол остануваат меѓу најголемите предизвици во борбата против ракот.
Организацијата апелира земјите да инвестираат повеќе во превенција, скрининг-програми и еднаков пристап до дијагностика и лекување, бидејќи, според експертите, најголемиот проблем денес не е недостатокот на знаење, туку недоволната примена на веќе познатите мерки за заштита на здравјето.
