Министерот за здравство, Азир Алиу, на прес-конференција по завршувањето на седницата на Владата соопшти дека одземени се лиценците на шест фирми кои одгледуваат канабис за медицински цели. Станува збор за компаниите: „Алфа фарм“, „Грин лајф“, „ЦБД мед план“, „Лајф плант“, „Ата фарм“ и „Канабидоис“.
Алиу истакна дека одлуката за одземање на лиценците добила дополнителна институционална тежина по денешната владина седница, а засилените вонредни контроли ќе опфатат вкупно 43 правни лица. Контролите се спроведуваат во соработка со МВР, МАЛМЕД, Инспекторатот за земјоделство, Државниот санитарен и здравствен инспекторат и други надлежни институции.
Досега извршените 13 контроли покажале неправилности кај шест фирми, вклучувајќи несоодветно складирање на сув цвет, недостасувачка документација за производство и продажба, несовпаѓање помеѓу евидентираните и фактички присутни количини, и ненавремено известување за промени согласно законските обврски.
Целта на овие вонредни контроли, како што рече Алиу, е да се обезбеди доследна примена на законите, да се унапреди надзорот врз производството и прометот, и да се обезбеди транспарентно и законско функционирање на секторот.
Министерот најави дека по завршувањето на контролите кај сите 43 правни лица ќе се подготви нова и поцврста законска регулатива за одгледување канабис за медицински цели, во согласност со ЕУ директивите и со реалната состојба на теренот, со цел да се спречи злоупотреба.
Обвинителството за гонење организиран криминал и корупција (ЈОГОКК) и МВР истражуваат дали петте тони марихуана запленети во Србија се поврзани со марихуаната од магацините на овие производители. Во рамките на акцијата досега се запленети над 40 тони марихуана од повеќе правни лица на територијата на државата.
