Селанец од Кичево, кој бил нападнат од мечка во август 2022 година додека се враќал од својата нива кон дома, доби вкупно 300.000 денари отштета од државата, откако Апелациониот суд во Гостивар ја намали првостепената пресуда од 350.000 денари што му ја досуди судот во Кичево.
Според судските податоци, нападот се случил без никаква провокација, при што мечката го гризнала по главата, дланките и натколеницата. Повредениот претрпел сериозни телесни повреди, бил шиен во Градската болница во Прилеп, примил вакцина против беснило и бил под психијатриска грижа за да се справи со стравот и траумата од нападот. Болката и непријатноста траеле најмалку десет дена.
Првостепениот суд во Кичево му досудил 350.000 денари за нематеријална штета, но образложил дека нападот бил извршен од една мечка, а не од чопор, па според тоа болката и стравот биле помалку значајни. Селанецот преку адвокат се жалел до Апелациониот суд, истакнувајќи дека државата не ги презела превентивните мерки за заштита на граѓаните и дека висината на отштетата не ја одразува целосно тежината на повредите и траумата.
Апелациониот суд во Гостивар го преиначил износот на отштетата, досудувајќи 300.000 денари за нематеријална штета, распределено вака: 100.000 денари за претрпени физички болки, 100.000 денари за страв, 50.000 денари за душевни болки поради намалена општа животна активност и 50.000 денари за душевни болки поради нагрденост.
Овој случај ја потенцира потребата од поголема грижа на државата за заштита на животот и здравјето на граѓаните, особено во региони каде што постои ризик од напади од диви животни.
