Од „Охрид Мол“ алармираат за серија опасни ситуации што во изминатиот период биле регистрирани на паркинг-просторот на трговскиот центар, каде поединци управувале мотори на начин што сериозно ја загрозувал безбедноста на посетителите и останатите присутни.
Според информациите споделени од трговскиот центар преку социјалните мрежи, биле забележани случаи на возење со прекумерна брзина, изведување ризични маневри, возење на едно тркало, како и непрописно паркирање во рамки на просторот.
Од таму предупредуваат дека ваквото однесување претставува директен ризик за посетителите, закупците и вработените кои секојдневно се движат низ паркингот и околината на објектот.
Во објавата посочуваат дека сите инциденти биле регистрирани преку системот за видеонадзор и безбедносните камери поставени на локацијата.
„Сите вакви инциденти се евидентирани преку системот за видеонадзор и безбедносните камери на трговскиот центар и ќе бидат доставени до надлежните институции за понатамошно постапување, со цел соодветно санкционирање“, наведуваат од „Охрид Мол“.
Од трговскиот центар упатија апел до сите учесници во сообраќајот и посетители да ги почитуваат правилата и да покажат одговорно однесување, со цел зачувување на безбедноста и нормалното функционирање на просторот околу објектот.
