Според најновите сезонски прогнози и анализи на европските метеоролошки центри, летото 2026 година во Македонија и пошироко на Балканот би можело да биде потопло и посуво од просекот, со зголемен ризик од интензивни топлотни бранови во текот на јули и август.
Главните сезонски модели на ECMWF (European Centre for Medium-Range Weather Forecasts), кој важи за еден од најрелевантните светски центри за долгорочни временски прогнози, укажуваат на изразени позитивни температурни отстапувања над Југоисточна Европа и Медитеранот.
За Скопје, прогнозите сигнализираат долго, стабилно и сушно лето, со чести температури над 35 степени Целзиусови. Во одредени периоди, особено во втората половина на јули и почетокот на август, не се исклучува можноста живата во термометрите да надмине и 40 степени.
Поради густата урбана структура и ефектот на загревање во градските средини, метеоролозите предупредуваат и на појава на таканаречени „тропски ноќи“, кога минималните ноќни температури остануваат над 24 до 25 степени. Ваквите услови дополнително можат да го засилат чувството на жештина и непријатност.
Според сегашните анализи, јуни најверојатно ќе донесе релативно стабилно и топло време, со повремени локални нестабилности и краткотрајни невремиња. Јули, пак, се издвојува како месец со најголем потенцијал за екстремно високи температури и продолжени сушни периоди.
Август се очекува да го продолжи топлиот тренд, но со нешто поголема веројатност за локални поројни дождови, грмежи и краткотрајни временски непогоди, карактеристични за доцниот дел од медитеранското лето.
Слични временски сценарија се очекуваат и во соседството. Македонија и Србија се меѓу подрачјата со најголема веројатност за интензивна топлина, додека во Грција и делови од јадранското крајбрежје повторно се зголемува ризикот од суши и пожари.
Дополнителен фактор е и очекуваното повисоко ниво на температурите на морето во Егејот и Јадранот, што може дополнително да влијае врз засилување на топлотните бранови во внатрешноста на Балканот.
Метеоролозите посочуваат дека веќе топлата пролет и намалената влажност на почвата во делови од Европа создаваат услови високите температури полесно да се интензивираат и подолго да се задржат.
Сепак, експертите нагласуваат дека сезонските прогнози не можат однапред прецизно да предвидат конкретни денови со екстремна топлина или врнежи, но актуелните анализи испраќаат јасен сигнал дека Балканот и ова лето повторно би можел да биде меѓу најтоплите региони во Европа.
