Агенцијата за супервизија на капитално финансирано пензиско осигурување (МАПАС) ги извести осигурениците со бенефициран стаж дека од 20 октомври 2026 година започнува рокот во кој треба да одлучат дали ќе го продолжат членството во задолжителен пензиски фонд, односно во вториот пензиски столб.
Од МАПАС информираат дека, согласно законските одредби, членовите на задолжителните пензиски фондови кои навршиле стаж врз основа на кој старосната граница за пензионирање им се намалува за најмалку една година, имаат право да изберат дали ќе го задржат своето членство во вториот столб.
Ова право произлегува од член 118 став (3) од Законот за пензиското и инвалидското осигурување. Осигурениците што спаѓаат во оваа категорија треба да ја донесат одлуката најдоцна до 20 јануари 2027 година.
Изборот се прави со доставување писмена изјава за продолжување на членството во задолжителниот пензиски фонд. Доколку осигурениците не ја достават изјавата во предвидениот рок, односно до 20 јануари 2027 година, нивното членство во задолжителниот пензиски фонд ќе престане.
По престанувањето на членството, пензиското друштво ќе треба да го пренесе вкупниот износ на средствата од индивидуалните сметки на овие членови во Фондот на пензиското и инвалидското осигурување на Северна Македонија (Фондот на ПИОСМ).
Тоа значи дека осигурениците кои нема да поднесат изјава за продолжување на членството ќе останат осигурени само во тековно финансираното пензиско осигурување засновано на генерациска солидарност, односно во првиот пензиски столб преку Фондот на ПИОСМ. Преку овој фонд тие ќе го остваруваат правото на пензија.
Од МАПАС посочуваат и дека осигурениците кои во претходните години веќе доставиле изјава за продолжување на членството не треба повторно да ја поднесуваат. Нивното членство е продолжено врз основа на претходно доставената изјава, па нема потреба од повторување на постапката.
