Во Скопје, во Кривичниот суд, денес беа презентирани видео-снимки како доказен материјал во постапка што ја води ОЈО Скопје, а кои се однесуваат на настани што се случиле на 2 март, неколку часа пред трагедијата во која животот го загубиле Ивана Стојаноска и нејзината ќерка Катја.
Според презентираните докази, снимките од безбедносни камери поставени зад Кривичниот суд прикажуваат движење и комуникација меѓу повеќе лица, меѓу кои и обвинетиот Стојанче Јовановски, сведокот Мартин Саздов и покојната Ивана Стојаноска, кои тој ден пристигнале во судскиот комплекс поради претходни постапки.
На снимките се гледа како групата се движи низ просторот околу судот, при што во повеќе наврати доаѓа до вербални расправии и тензични ситуации меѓу Стојанче и Ивана, кои се случуваат пред очите на присутните.
Според доказниот материјал, во 12:40 часот е забележан момент на физички напад, при што Стојанче со удар ја погодува Ивана, по што нејзината глава се поместува од силата на ударот, а таа веднаш реагира и се обидува да повика помош преку телефон.
Потоа на местото пристигнуваат полициски службеници, кои разговараат со присутните лица и остануваат на лице место одредено време, по што си заминуваат. Во судницата било изнесено и сведочење дека полициските службеници наводно им порачале на присутните да „си го решат проблемот“, што дополнително предизвика реакции во јавноста.
Обвинителството презентираше и дополнителни докази, меѓу кои извештаи од мобилен телефон, медицинска документација и психијатриски анализи, со кои се прави обид да се реконструира психичката и физичката состојба на жртвата пред трагичниот исход.
Според наводите во обвинението, Стојанче Јовановски се товари за повеќе кривични дела, меѓу кои насилство, телесни повреди, загрозување на сигурноста и наведување на самоубиство, додека постапката продолжува пред надлежниот суд.
Случајот предизвика силни реакции во јавноста поради сериозноста на наводите и трагичниот исход, а судската постапка сè уште е во тек.
